Социалдык адилеттүүлүк жана инклюзивдик экономикалык өнүгүү

Советтер Союзу кулап, көз карандысыздыкка ээ болгондон бери отуз жыл өтсө дагы, Кыргыз Республикасы өз өнүгүү нугун таба элек. Эгемендүү мамлекет статусуна ээ болуп Советтер Союзунун курамынан чыккан башка бир нече өлкөлөр сыяктуу эле Кыргызстан да 1990-жылдары экономикалык шокко кабылган, анткени ата мекендик өнөр жай жаңы экономикалык системада атаандаштыкты түзө алган эмес. Азыркы убакытка чейин Кыргызстан анын кесепеттеринен жарым-жартылай гана калыбына келген. Экономиканы индустриялаштыруунун төмөн деңгээли өлкөнүн өзүндө дээрлик эч бир кошумча наркты түзө албай келет.

Бүгүнкү күндө калктын үчтөн бир бөлүгү жакырчылыктын чегинде жашайт, ал эми социалдык камсыздоо системасы калктын аярлуу катмарын жетиштүү деңгээлде камсыз кыла албайт. Эмгек рыногунда формалдуу эмес иш менен камсыз кылынгандардын үлүшү абдан жогору (70 пайыздан ашык), а бул жумушчулардын туруксуз абалына алып келет.

Ички эмгек рыногундагы абал начар болгондуктан, көптөгөн адамдар эмгек миграциясына кетишет. Эмгек мигранттары акча которуулары аркылуу ички дүң өндүрүштүн үчтөн бир бөлүгүнө салым кошушат. Бул өлкөнү тышкы таасирлерге аярлуу кылат, ошондой эле катаал социалдык кесепеттерге алып келет.

Коомдун бардык катмарлары үчүн бирдей укуктарды жана бирдей мүмкүнчүлүктөрдү камсыз кылган күчтүү социалдык мамлекетти түзүү социалдык жактан адилеттүү жана туруктуу өнүгүү үчүн абдан маанилүү болуп эсептелинет.

Фридрих Эберт фонду мамлекеттик мекемелердеги, кесиптик бирликтердеги жана жарандык коом катарындагы өнөктөштөрүн Кыргызстандын бардык жарандарынын бакубат жашоосу үчүн шарттарды сунуш кылган туруктуу, социалдык адилеттүү экономикалык моделге карай жолдорду издөөдө колдоо көрсөтөт. Ушул максатта Фридрих Эберт фонду илимий изилдөөлөрдү тапшыруу, потенциалды жогорулатуу программаларын уюштуруу менен биргеликте кызыкдар болгон тараптар үчүн көптөгөн диалогторду түзүүгө салым кошуп келет.